ஜெயிலர், வேட்டையன் படங்களின் வெற்றியை தொடர்ந்து சூப்பர் ஸ்டார் ரஜினிகாந்த் தற்போது லோகேஷ் கனகராஜ் இயக்கத்தில் கூலி படத்தில் நடித்து முடித்துள்ளார். இந்த படத்தின் படப்பிடிப்பு அண்மையில் நிறைவுக்கு வந்தது. இதை ஒரு மேக்கிங் வீடியோ மூலம் படக்குழு தெரியப்படுத்தினர். இந்த படத்தில் ரஜினியுடன் சத்யராஜ், நாகர்ஜுனா, ஸ்ருதி ஹாசன், கன்னட சூப்பர் ஸ்டார் உபேந்திரா, கேமியோ ரோலில் பாலிவுட் சூப்பர் ஸ்டார் ஆமிர்கான் ஆகியோர் நடிக்கின்றனர். இதில் ரஜினிக்கு ஜோடி இல்லை, மகளாக ஸ்ருதி ஹாசன் நடிப்பதாக சொல்லப்படுகிறது. கூடவே பூஜா ஹெக்டே ஒரு பாடலுக்கு ஐட்டம் டான்ஸ் ஆடுகிறார். இந்த படத்தை சன் பிக்சர்ஸ் நிறுவனம் தயாரிப்பதால் பெரும்பாலான உரிமையை அவர்களே வைத்துள்ளனர். ஓடிடி உரிமையை அமேசான் பிரைம் நிறுவனத்துக்கு ரூ.120 கோடிக்கு விற்றுள்ளனர். இந்த நிலையில் தற்போது இப்படத்தின் வெளிநாடு வெளியீட்டு உரிமம் குறித்த தகவல் வெளிவந்துள்ளது. அதன்படி கூலி படத்தின் வெளிநாட்டு உரிமம் மொத்தமாக ரூ.80 கோடிக்கு விற்கப்பட்டிருப்பதாக கூறப்படுகிறது. இதன்மூலம் தமிழில் அதிக தொகைக்கு வெளிநாட்டில் விற்பனை செய்யப்பட்ட படம் எனும் புதிய வரலாற்று சாதனையை கூலி படம் நிகழ்த்தியுள்ளது. இதற்கு அடுத்தபடியாக விஜய் நடிக்கும் ஜன நாயகன் படம் ரூ.75 கோடிக்கு வியாபாரம் ஆகியுள்ளது. கூலி திரைப்படம் ஆகஸ்ட் 14-ம் தேதி வெளியாகும் என அறிவிக்கப்பட்டுள்ளது.ரஜினி நடித்த முதல் படம் அபூர்வ ராகங்கள் திரைப்படம் 1975-ம் ஆண்டு ஆகஸ்ட் 15-ம் தேதி வெளியானது. அந்தவகையில் இந்த ஆகஸ்ட் 15 உடன் ரஜினி நடிக்கவந்து 50 ஆண்டுகள் நிறைவடைகிறது. அதை கொண்டாடும் விதமாக ஆகஸ்ட் 14-ல் இப்படத்தை திரைக்கு கொண்டு வருகிறார்கள். அனிருத் இப்படத்துக்கு இசையமைக்கிறார். இவருடைய இசையில் ஏற்கனவே இப்படத்தின் தீம் பாடலும் ஒரு குட்டி பாடலும் அரங்கம் அதிரட்டுமே என்ற ராப் பாடலும் வெளியாகி நல்ல வரவேற்பை பெற்றது. ரிலீஸ் தேதி நெருங்கி வரும் நிலையில் இப்படத்தின் ஃபர்ஸ்ட் சிங்கிள் பற்றிய அப்டேட் இந்த வாரம் வெளியாகும் என எதிர்பார்க்கப்படுகிறது.