தமிழ் சினிமாவில் தனித்துவமான கதைக்களங்களாலும், வித்தியாசமான திரைக்கதை சொல்லும் முறையாலும் ரசிகர்களை கவர்ந்த இயக்குநர் கார்த்திக் சுப்புராஜ், தனது பத்தாவது திரைப்படத்தின் படப்பிடிப்பை வெற்றிகரமாக நிறைவு செய்துள்ளார். கடந்த ஆண்டு நவம்பர் மாதம் தொடங்கிய இந்தப் படம் தற்போது இறுதிக்கட்ட பணிகளில் தீவிரமாக நடைபெற்று வருகிறது.
‘பீட்சா’, ‘ஜிகர்தண்டா’, ‘இறைவி’, ‘பேட்ட’, ‘மகான்’, ‘ஜிகர்தண்டா டபுள் எக்ஸ்’ போன்ற படங்களின் மூலம் தனக்கென ஒரு தனி ரசிகர் பட்டாளத்தை உருவாக்கியுள்ள கார்த்திக் சுப்புராஜ், இந்த முறையும் பெரிய அளவிலான எதிர்பார்ப்பை ஏற்படுத்தியுள்ளார். குறிப்பாக, இந்தப் படத்திற்கு இசைஞானி இளையராஜா இசையமைப்பது ரசிகர்களிடையே மிகப்பெரிய உற்சாகத்தை ஏற்படுத்தியுள்ளது.
இந்தப் படம் இளையராஜாவின் 1540வது திரைப்படமாக உருவாக இருப்பது கூடுதல் சிறப்பாக பார்க்கப்படுகிறது. பல தலைமுறைகளாக தமிழ் சினிமாவின் இசை உலகை ஆட்கொண்டிருக்கும் இளையராஜா, கார்த்திக் சுப்புராஜின் கற்பனை உலகத்துடன் இணைய இருப்பது சினிமா ரசிகர்களிடையே பெரும் ஆர்வத்தை கிளப்பியுள்ளது.
ஆஸ்கர் விருது பெற்ற சிக்யா எண்டர்டெயின்மெண்ட் நிறுவனம், ஜியோ ஸ்டுடியோஸுடன் இணைந்து இப்படத்தை தயாரிக்கிறது. குனீத் மோங்கா கபூர் மற்றும் அசின் ஜெயின் தலைமையிலான இந்த தயாரிப்பு நிறுவனம், கார்த்திக் சுப்புராஜுடன் முதல் முறையாக கைகோர்த்துள்ளது குறிப்பிடத்தக்கது.
இந்த கூட்டணியை பற்றி பேசிய இளையராஜா, “ஒவ்வொரு படத்திற்கும் தனி உணர்வு இருக்கும். இந்தப் படத்தின் பின்னணி இசை பணிகளில் ஈடுபட்டபோது, அந்த இசையை தனி ஆல்பமாக வெளியிட வேண்டும் என்ற எண்ணமே வந்தது. அந்த அளவுக்கு இசை சிறப்பாக வந்திருக்கிறது. ரசிகர்கள் அதை கண்டிப்பாக ரசிப்பார்கள்,” என்று தெரிவித்துள்ளார்.
கார்த்திக் சுப்புராஜும் இந்த வாய்ப்பை தனது வாழ்நாள் கனவாக குறிப்பிட்டுள்ளார். “இளையராஜா சார் உடன் பணியாற்றுவது என் நீண்ட நாள் ஆசை. அது என் பத்தாவது படத்தில் நனவாகியிருப்பது மிகப்பெரிய மகிழ்ச்சி,” என்று அவர் கூறியுள்ளார்.
மேலும், ஜியோ ஸ்டுடியோஸ் மற்றும் சிக்யா எண்டர்டெயின்மெண்ட் தரப்பினரும், கதை சொல்லலும் இசையும் இணையும் இந்த திரைப்படம் ரசிகர்களுக்கு வித்தியாசமான திரையரங்க அனுபவத்தை வழங்கும் என நம்பிக்கை தெரிவித்துள்ளனர்.
இசை, கதை, காட்சியமைப்பு என பல வலுவான அம்சங்கள் ஒன்றாக இணைந்திருக்கும் இந்தப் படம், தமிழ் சினிமாவின் மிகவும் எதிர்பார்க்கப்படும் படங்களில் ஒன்றாக மாறியுள்ளது.