அதீத சக்திகள் கொண்ட சந்திரா (கல்யாணி பிரியதர்ஷன்), தனது கடந்த காலத்தை மறைத்து பெங்களூரில் சாதாரண வாழ்க்கை நடத்த வருகிறார். பேக்கரியில் வேலை செய்யும் அவர், எதிரே வசிக்கும் இளைஞர்கள் நஸ்லன், சந்து சலீம்குமார், அருண் குரியன் ஆகியோரால் கவரப்படுகிறார். இதற்கிடையில், மனிதர்களை கடத்தி உறுப்புகளை திருடும் ஆபத்தான கும்பல் நகரில் அச்சத்தை ஏற்படுத்த, போலீஸ் இன்ஸ்பெக்டர் சாண்டியுடன் மோதும் சந்திராவின் உண்மையான அடையாளம் வெளிப்படுகிறது. அவர் யார்? ஏன் இங்கு வந்தார்? என்பதைக் கண்டு பிடிக்க ரசிகர்கள் ஆர்வமாக திரையைப் பார்க்கின்றனர். சந்திரா என்கிற சூப்பர் ஹீரோவாக கல்யாணி பிரியதர்ஷன் பளபளப்பாக ஜொலிக்கிறார். சண்டைக் காட்சிகளில் ஸ்டைலாக செயல்பட்டு, வசனங்கள் குறைவாக இருந்தாலும் உடல் மொழியால் கதாபாத்திரத்தை உயிர்ப்பிக்கிறார். அவரை சுற்றி வரும் நஸ்லன், சந்து, அருண் ஆகியோரின் காமெடி மற்றும் இயல்பான நடிப்பு பல இடங்களில் சிரிக்க வைக்கிறது. வில்லனாக போலீஸ் இன்ஸ்பெக்டர் சாண்டி, அச்சமூட்டும் நடிப்பால் தாக்கம் ஏற்படுத்துகிறார். சிறப்பு தோற்றங்களில் டோவினோ தாமஸ், துல்கர் சல்மான் ஆகியோர் எதிர்பார்ப்பை தூண்டும் வகையில் கையாளப்பட்டுள்ளனர். ஜேக்ஸ் பிஜாயின் பின்னணி இசை, நிமிஷ் ரவியின் ஒளிப்பதிவு, யானிக் பென்னின் சண்டை இயக்கம், தரமான VFX ஆகியவை படத்தை பிரமாண்டமாகவும், தரமாகவும் காட்டுகின்றன. தொகுப்பாளர் சாமன் சாக்கோ, சிக்கலான உலகத்தை எளிமையாக, சுவாரஸ்யமாக சொல்லி முதல் பாதியில் கதையின் ஈர்ப்பை அதிகரிக்கிறார். தென்னிந்தியாவில் சூப்பர் ஹீரோ வகை படம் அரிதானது என்பதையும், அதை ரசிகர்களிடம் கொண்டு செல்லும் சவாலை இயக்குநர் டொமினிக் அருண் சிறப்பாக கையாண்டுள்ளார். சந்திராவின் சிறுவயது, அதீத சக்தி பெறும் பயணம், அவரது போராட்டங்கள் ஆகியவை குழந்தைகள் முதல் பெரியவர்கள் வரை ரசிக்கும்படி உருவாக்கப்பட்டுள்ளன. ஆனால் இரண்டாம் பாதியில், சூப்பர் ஹீரோ உலகம் விரிவடையும் முயற்சி சற்று தொய்வாக உணரப்படுகிறது. சந்திரா எதற்காக பெங்களூருக்கு வந்தார், யாருக்கு எதிராக போராடுகிறார் போன்ற கேள்விகளுக்கான பதில்கள் தெளிவாக வழங்கப்படாததால், சில பகுதிகள் சற்று சோர்வாகிறது. முதல் பாதியில் சந்திராவின் பின்னணி, சக்திகள் ஆகியவை ரசிகர்களை ஈர்க்க, இரண்டாம் பாதியில் உலகத்தை விரிவாக்கும் முயற்சி சற்றே பலவீனமாக இருந்தாலும், புதிய சூப்பர் ஹீரோ அனுபவத்தை ரசிகர்களுக்குக் கொடுக்க முயன்ற ‘லோகா – அத்தியாயம் 1 : சந்திரா’ பாராட்டத்தக்க படம்! மதிப்பீடு: 3.75/5