நடிகர் கெளதம் ராம் கார்த்திக் முன்னணி கதாபாத்திரத்தில் நடிக்கும் ‘ரூட் – ரன்னிங் அவுட் ஆஃப் டைம்’ திரைப்படம் தற்போது இறுதிக்கட்ட பணிகளில் வேகமாக முன்னேறி வருகிறது. சூரியபிரதாப் எஸ் எழுதி இயக்கும் இந்த படம் அறிவியல் தளத்தையும் திரில்லர் அம்சங்களையும் இணைத்து உருவாகும் வித்தியாசமான கதையமைப்பை கொண்டதாக சொல்லப்படுகிறது. மனிதர்களின் முடிவுகள், காலத்தின் அழுத்தம் மற்றும் அதனால் உருவாகும் எதிர்பாராத சூழ்நிலைகள் ஆகியவை கதையின் மையமாக இருக்கும் என படக்குழு தரப்பில் தகவல் வெளியாகியுள்ளது. இந்த படத்தில் கெளதம் ராம் கார்த்திக்குடன் பாலிவுட் நடிகர் அபார்ஷக்தி குரானா முக்கிய வேடத்தில் நடித்துள்ளதால், அவர் தமிழ் திரையுலகில் அறிமுகமாகிறார். கதாநாயகியாக பவ்யா திரிகா நடித்துள்ளதுடன், ஒய்.ஜீ. மகேந்திரன், பாவ்னி ரெட்டி, லிங்கா மற்றும் ஆர்.ஜே. ஆனந்தி உள்ளிட்ட பலரும் முக்கியமான கதாபாத்திரங்களில் தோன்றுகின்றனர். படத்தின் படப்பிடிப்பு ஏற்கனவே நிறைவடைந்த நிலையில் தற்போது எடிட்டிங், இசை அமைப்பு, சவுண்ட் டிசைன், விஎஃப்எக்ஸ் உள்ளிட்ட தொழில்நுட்ப பணிகள் தீவிரமாக நடைபெற்று வருகின்றன. காட்சியமைப்பிலும் தொழில்நுட்ப தரத்திலும் புதிய அனுபவத்தை வழங்கும் வகையில் படம் உருவாகி வருவதாக கூறப்படுகிறது. வெரஸ் புரொடக்‌ஷன்ஸ் நிறுவனம் சார்பில் ஷேக் முஜீப், சஞ்சய் சங்கர், ராஜராஜன் ஞானசம்பந்தம் மற்றும் தனிஷ்டன் பெர்னாண்டோ ஆகியோர் இணைந்து தயாரிக்கும் இந்த படத்துக்கு அர்ஜுன் ராஜா ஒளிப்பதிவு செய்துள்ளார். எடிட்டிங் பணிகளை ஜான் ஆபிரகாம் கவனிக்க, இசையை அரன் ரே அமைத்துள்ளார். மிராக்கிள் மைக்கேல் ஆக்ஷன் காட்சிகளை வடிவமைத்துள்ள இந்த படம் சஸ்பென்ஸ் மற்றும் பரபரப்பான திரில்லர் அம்சங்களுடன் ரசிகர்களை கவரும் வகையில் உருவாகி வருகிறது. போஸ்ட் புரொடக்‌ஷன் பணிகள் முடிவடையும் நிலையில், விரைவில் படத்தின் வெளியீட்டு தேதி குறித்த அறிவிப்பு வெளியாகும் என எதிர்பார்க்கப்படுகிறது.