ஆர்.எஸ். இன்ஃபோடெயின்மென்ட் தயாரிப்பில் சூரி கதையின் நாயகனாக நடித்துள்ள ‘மண்டாடி’ திரைப்படம் தணிக்கைப் பணிகளை நிறைவு செய்து U/A சான்றிதழ் பெற்றுள்ளது. இதையடுத்து, மதிமாறன் புகழேந்தி எழுதி இயக்கியுள்ள இப்படம் செப்டம்பர் 10, 2026 அன்று உலகம் முழுவதும் திரையரங்குகளில் வெளியாகவுள்ளது.
பாரம்பரிய மீனவர்களின் பாய்மரப் படகுப் பந்தய கலாச்சாரத்தை மையமாகக் கொண்டு உருவாகியுள்ள ‘மண்டாடி’, இதுவரை தமிழ் சினிமாவில் அதிகம் பதிவு செய்யப்படாத ஒரு விளையாட்டு உலகத்தைப் பின்னணியாகக் கொண்டுள்ளது. கடலோர வாழ்வியலுடன் பின்னிப் பிணைந்த கதைக்களத்தில் விளையாட்டு, ஆக்ஷன், உணர்வுகள், உறவுகள் மற்றும் விடாமுயற்சி ஆகிய அம்சங்கள் இணைந்திருப்பதாக படக்குழு தெரிவித்துள்ளது.
எல்ரெட் குமார் தயாரித்துள்ள இப்படத்தில் சூரி இதுவரை ஏற்றிராத வித்தியாசமான மற்றும் தீவிரமான கதாபாத்திரத்தில் நடித்துள்ளார். கதாபாத்திரத்திற்காக உடல் ரீதியாக கடுமையான பயிற்சிகளை மேற்கொண்டதுடன், கடலில் நடைபெற்ற படப்பிடிப்புக்காகவும் சிறப்பு பயிற்சிகளை மேற்கொண்டுள்ளார். மேலும், டூப் கலைஞர்களின் உதவியின்றி கடலில் படமாக்கப்பட்ட சவாலான சண்டைக் காட்சிகளில் சூரியே நடித்துள்ளதாக கூறப்படுகிறது. படத்தின் புரமோஷன் காட்சிகளில் இடம்பெற்ற அவரது புதிய தோற்றமும், உடல் மாற்றமும் ரசிகர்களிடம் ஏற்கனவே கவனம் பெற்றுள்ளன.
‘மண்டாடி’ படத்திற்கு ஜி.வி. பிரகாஷ் குமார் இசையமைத்துள்ளார். அவரது இசையில் வெளியாகியுள்ள “மண்டாடி மண்டாடி” மற்றும் “உசுரே நீதான் புள்ள” ஆகிய இரண்டு பாடல்களும் ரசிகர்கள் மற்றும் இசை ஆர்வலர்களிடம் நல்ல வரவேற்பைப் பெற்று வருகின்றன.
சூரியுடன் சுஹாஸ், மகிமா நம்பியார், சத்யராஜ், ரவீந்திர விஜய், அச்சுத்குமார், பால சரவணன், மிதுன், கீர்த்திகா உள்ளிட்டோர் முக்கிய கதாபாத்திரங்களில் நடித்துள்ளனர். கடலையும், மீனவர்களின் பாரம்பரிய வாழ்வியலையும் மையமாகக் கொண்ட இந்தக் கதையை பிரம்மாண்டமான திரையரங்க அனுபவமாக உருவாக்க படக்குழு முயற்சித்துள்ளது.
தணிக்கைச் சான்றிதழ் கிடைத்துள்ள நிலையில், ‘மண்டாடி’ படத்தின் இறுதிக்கட்ட விளம்பரப் பணிகளில் படக்குழு கவனம் செலுத்தி வருகிறது. செப்டம்பர் 10, 2026 அன்று உலகம் முழுவதும் திரையரங்குகளில் வெளியாகும் இப்படம், சூரியின் மாறுபட்ட கதாபாத்திரத்தாலும், மீனவர்களின் பாய்மரப் படகுப் பந்தயத்தை மையமாகக் கொண்ட கதைக்களத்தாலும் ரசிகர்கள் மத்தியில் எதிர்பார்ப்பை ஏற்படுத்தியுள்ளது.