ஷர்வானந்த், டாக்டர் ராஜசேகர், மாளவிகா நாயர், அதுல் குல்கர்னி உள்ளிட்டோர் நடிப்பில் உருவாகியுள்ள ‘பைக்கர்’ திரைப்படம் இந்தியாவின் முதல் பைக் ஸ்போர்ட்ஸ் படமாக பிரம்மாண்டமாக உருவாகியுள்ளது. அபிலாஷ் ரெட்டி இயக்கியுள்ள இந்தப் படத்தை UV Creations நிறுவனம் தயாரித்துள்ள நிலையில், விக்ரம் ரெட்டி வழங்க, வம்சி கிருஷ்ணா ரெட்டி மற்றும் பிரமோத் உப்பலபாட்டி தயாரித்துள்ளனர். இப்படம் தெலுங்கு, தமிழ், மலையாளம் உள்ளிட்ட பல மொழிகளில் பான் இந்திய அளவில் வரும் ஏப்ரல் 3ஆம் தேதி வெளியாகிறது. இந்த நிலையில், படத்தின் தமிழ்ப்பதிப்பு வெளியீட்டை முன்னிட்டு சென்னை நகரில் பத்திரிகையாளர் சந்திப்பு நடைபெற்றது. இதில் படக்குழுவினர் கலந்து கொண்டு படத்தின் சிறப்புகளை பகிர்ந்தனர். படம் குறித்து பேசியவர்கள் அனைவரும், ‘பைக்கர்’ ஒரு சாதாரண ரேசிங் படம் அல்ல; உண்மை சம்பவங்களை அடிப்படையாகக் கொண்ட உணர்ச்சி மிக்க கதையுடன் கூடிய முயற்சி என்று தெரிவித்தனர். குறிப்பாக பைக் ரேசிங் உலகை நம்பகத்தன்மையுடன் திரையில் கொண்டு வர தொழில்நுட்ப ரீதியாக பெரும் உழைப்பு எடுத்துள்ளதாகவும் கூறினர். இசையமைப்பாளர் ஜிப்ரான், இந்தப் படத்தின் கதை மற்றும் வேகம் தனக்கு மிகவும் பிடித்ததாகவும், சர்வதேச அளவிலும் இப்படம் பேசப்படும் என்ற நம்பிக்கையையும் தெரிவித்தார். ஒளிப்பதிவாளர் மதி மற்றும் புரடக்ஷன் டிசைனர் ராஜீவன் ஆகியோர், ரேஸ் காட்சிகளை உருவாக்கிய அனுபவம் சவாலாக இருந்தாலும், அதனை உண்மைத்தன்மையுடன் பதிவு செய்ய தீவிரமாக உழைத்ததாக கூறினர். இயக்குநர் அபிலாஷ் ரெட்டி, ‘பைக்கர்’ வெறும் ரேஸ் பற்றிய படம் அல்ல; மனித உணர்வுகளையும் இணைக்கும் கதை என விளக்கினார். தமிழ் ரசிகர்களின் மனதை படம் கண்டிப்பாக தொடும் என்ற நம்பிக்கையையும் அவர் வெளிப்படுத்தினார். நடிகர் ஷர்வானந்த், தனது திரைப்பயணத்தில் மிகவும் முக்கியமான படமாக ‘பைக்கர்’ இருக்கும் என்றும், இந்தக் கதாபாத்திரத்திற்காக 22 கிலோ எடையை குறைத்து இரு வயது பரிமாணங்களில் நடித்துள்ளதாகவும் தெரிவித்தார். இது தனது வாழ்க்கையில் ஒரு மாற்றத்தை ஏற்படுத்திய படம் என்றும் கூறினார். டாக்டர் ராஜசேகர், படத்தின் வெளியீட்டை முன்னிட்டு ரசிகர்கள் திரையரங்கில் வந்து ஆதரிக்க வேண்டும் எனக் கேட்டுக் கொண்டார். நடிகை மாளவிகா நாயரும், தமிழ் ரசிகர்களின் ஆதரவை எதிர்நோக்குவதாக தெரிவித்தார். மொத்தத்தில், தொழில்நுட்பம், உணர்ச்சி மற்றும் அதிவேக ரேசிங் காட்சிகள் இணைந்த ‘பைக்கர்’ படம், ரசிகர்களுக்கு புதிய அனுபவத்தை தரும் என படக்குழு நம்பிக்கை தெரிவித்துள்ளது. இப்படம் உலகம் முழுவதும் ஏப்ரல் 3ஆம் தேதி திரையரங்குகளில் வெளியாகிறது.