‘விஸ்வநாத் & சன்ஸ்’ திரைப்படத்தின் மூன்றாவது பாடலான ‘தி ஒன் ரூல்’ வெளியாகி ரசிகர்களின் கவனத்தை ஈர்த்து வருகிறது. ஏற்கனவே ‘பட்டாம்பூச்சி’ மற்றும் ‘தி வெட்டிங் சாங்’ ஆகிய பாடல்கள் நல்ல வரவேற்பைப் பெற்ற நிலையில், தற்போது வெளியாகியுள்ள ‘தி ஒன் ரூல்’ பாடல் ஆல்பத்தின் மீதான எதிர்பார்ப்பை மேலும் அதிகரித்துள்ளது.
துடிப்பான இசை, அதிரடியான தாளம் மற்றும் உற்சாகம் நிறைந்த பாடலாக உருவாகியுள்ள ‘தி ஒன் ரூல்’, நடிகர் சூர்யாவை இதுவரை பார்த்திராத வகையில் எனர்ஜி நிறைந்த தோற்றத்தில் காட்சிப்படுத்துகிறது. பாடலின் இசையும், சூர்யாவின் திரைத் தோற்றமும் இணைந்து ரசிகர்களை உற்சாகப்படுத்தும் வகையில் அமைந்துள்ளன.
இந்தப் பாடலுக்கு இசையமைப்பாளர் ஜி.வி. பிரகாஷ் குமார் இசையமைத்துள்ளார். பாடலின் வரிகளை எழுதியதுடன் கானா காதர் பாடலையும் பாடியுள்ளார். அவரது தனித்துவமான குரல் பாடலுக்கு மேலும் வித்தியாசமான தன்மையை வழங்கியுள்ளது.
‘விஸ்வநாத் & சன்ஸ்’ படத்திலிருந்து அடுத்தடுத்து வெளியாகி வரும் பாடல்கள் படத்தின் மீதான எதிர்பார்ப்பை அதிகரித்து வருகின்றன. குறிப்பாக மூன்று பாடல்களும் வெவ்வேறு இசை அனுபவத்தை வழங்குவதால், படத்தின் முழுமையான இசை ஆல்பம் மீதும் ரசிகர்கள் மத்தியில் ஆர்வம் உருவாகியுள்ளது.
இப்படத்தை ‘தோழா’, ‘வாத்தி’ உள்ளிட்ட படங்களை இயக்கிய வெங்கி அட்லூரி இயக்கியுள்ளார். சிதாரா என்டர்டெயின்மென்ட்ஸ் மற்றும் ஃபார்ச்சூன் ஃபோர் சினிமாஸ் நிறுவனங்களின் சார்பில் சூர்யதேவர நாக வம்ஷி மற்றும் சாய் சௌஜன்யா இணைந்து தயாரித்துள்ளனர். ஸ்ரீகரா ஸ்டுடியோஸ் இப்படத்தை வழங்குகிறது.
குடும்ப உறவுகள் மற்றும் பொழுதுபோக்கு அம்சங்களை மையமாகக் கொண்டுள்ள இப்படம், சுதந்திர தினத்தை முன்னிட்டு வரும் ஆகஸ்ட் 14ஆம் தேதி உலகம் முழுவதும் திரையரங்குகளில் பிரம்மாண்டமாக வெளியாகிறது.