மக்கள் செல்வன் விஜய் சேதுபதி நடிப்பில் இயக்குநர் பூரி ஜெகன்நாத் இயக்கியுள்ள பான்-இந்தியா திரைப்படமான ‘ஸ்லம் டாக் – 33 டெம்பிள் ரோடு’ படத்தின் டீசர் வெளியீட்டு விழா சென்னை நகரில் நடைபெற்றது. Puri Connects மற்றும் JB Motion Pictures நிறுவனங்கள் இணைந்து தயாரித்துள்ள இந்தப் படம், ஆரம்ப கட்டத்திலிருந்தே ரசிகர்கள் மத்தியில் பெரும் எதிர்பார்ப்பை ஏற்படுத்தி வருகிறது.
நிகழ்ச்சியில் இயக்குநர் பூரி ஜெகன்நாத், நடிகர் விஜய் சேதுபதி, தயாரிப்பாளர் சார்மி கௌர், நடிகை சம்யுக்தா, இசையமைப்பாளர் ஹர்ஷவர்தன் ராமேஷ்வர், நடிகர் விடிவி கணேஷ் உள்ளிட்ட படக்குழுவினர் கலந்து கொண்டு திரைப்படம் குறித்த அனுபவங்களையும் தகவல்களையும் பகிர்ந்து கொண்டனர்.
படத்தின் தயாரிப்பாளர்களில் ஒருவரான JB நாராயண் ராவ், தயாரிப்பாளராக தனது முதல் திரைப்படமாக ‘ஸ்லம் டாக்’ அமைந்துள்ளதை மகிழ்ச்சியுடன் குறிப்பிட்டார். விஜய் சேதுபதி போன்ற திறமையான நடிகருடன் தனது முதல் தயாரிப்பை தொடங்கியிருப்பது பெருமை அளிப்பதாகவும் அவர் தெரிவித்தார்.
தயாரிப்பாளர் சார்மி கௌர் பேசும்போது, நடிகையாக அறிமுகமான பிறகு பல ஆண்டுகளுக்குப் பின்னர் தயாரிப்பாளராக சென்னை ஊடகங்களை சந்திப்பது மகிழ்ச்சி அளிப்பதாக கூறினார். ‘ஸ்லம் டாக்’ திரைப்படம் ஆக்சனும் உணர்வுகளும் கலந்த வித்தியாசமான படைப்பாக உருவாகியுள்ளதாகவும், விஜய் சேதுபதியின் நடிப்பு படத்தின் முக்கிய பலமாக இருக்கும் என்றும் தெரிவித்தார். மேலும் தபு, துனியா விஜய், சம்யுக்தா உள்ளிட்ட நடிகர்கள் தங்கள் கதாபாத்திரங்களுக்கு சிறப்பான பங்களிப்பை வழங்கியுள்ளதாக பாராட்டினார்.
இசையமைப்பாளர் ஹர்ஷவர்தன் ராமேஷ்வர், படத்தில் ஆறு பாடல்கள் இடம்பெற்றுள்ளதாகவும், ஒவ்வொரு பாடலும் ரசிகர்களுக்கு வித்தியாசமான அனுபவத்தை வழங்கும் வகையில் உருவாக்கப்பட்டுள்ளதாகவும் கூறினார். பாடல்களுடன் பின்னணி இசையிலும் புதுமையான முயற்சிகள் மேற்கொள்ளப்பட்டுள்ளதாக அவர் தெரிவித்தார்.
நடிகர் விடிவி கணேஷ், இயக்குநர் பூரி ஜெகன்நாத்தின் எளிமை மற்றும் தொழில்முறை அணுகுமுறையை பாராட்டியதுடன், படத்தில் இதுவரை நடித்திராத புதிய வகை கதாபாத்திரத்தில் நடித்துள்ளதாக கூறினார். விஜய் சேதுபதியின் உழைப்பு மற்றும் அர்ப்பணிப்பை நேரில் பார்த்தது தன்னை ஆச்சரியப்படுத்தியதாகவும் அவர் தெரிவித்தார்.
நடிகை சம்யுக்தா, பூரி ஜெகன்நாத்துடன் பணியாற்றியது தனித்துவமான அனுபவம் என குறிப்பிட்டார். விஜய் சேதுபதி ஒரு கதாபாத்திரமாக முழுமையாக மாறும் விதத்தை நேரில் காணும் வாய்ப்பு கிடைத்தது மறக்க முடியாத அனுபவம் என்றும் அவர் கூறினார்.
இயக்குநர் பூரி ஜெகன்நாத் பேசுகையில், இது தனது முதல் நேரடி தமிழ் திரைப்படம் என தெரிவித்தார். விஜய் சேதுபதியின் எளிமை மற்றும் நடிப்புத் திறமை தன்னை மிகவும் கவர்ந்ததாக கூறிய அவர், இந்தப் படத்தில் ரசிகர்கள் இதுவரை பார்த்திராத ஒரு புதிய விஜய் சேதுபதியை காண்பார்கள் என்றார்.
மேலும், ‘ஸ்லம் டாக் – 33 டெம்பிள் ரோடு’ திரைப்படத்தின் கதை இரண்டு உண்மை சம்பவங்களை அடிப்படையாகக் கொண்டு உருவாக்கப்பட்டுள்ளதாகவும், சமூகத்தின் விளிம்புநிலையில் வாழும் மக்களின் வாழ்க்கை, உணர்வுகள் மற்றும் அவர்களின் உலகத்தை மையமாகக் கொண்ட கதையாக இது உருவாகியுள்ளதாகவும் பூரி ஜெகன்நாத் தெரிவித்தார். இது வெறும் ஆக்சன் திரைப்படம் மட்டுமல்லாமல் வலுவான உணர்வுகளையும் கொண்ட குடும்பத் திரைப்படமாக இருக்கும் என்றும் அவர் கூறினார்.
நடிகர் விஜய் சேதுபதி தனது உரையில், துனியா விஜய், சம்யுக்தா, விடிவி கணேஷ் உள்ளிட்ட சக நடிகர்களின் பங்களிப்பை பாராட்டினார். இயக்குநர் பூரி ஜெகன்நாத்தின் கதை சொல்லும் திறன் மற்றும் படைப்பாற்றல் தனித்துவமானது என்றும், ‘ஸ்லம் டாக்’ அவரது சிறந்த படைப்புகளில் ஒன்றாக இருக்கும் என்ற நம்பிக்கையை வெளிப்படுத்தினார்.
இந்தப் படத்தில் விஜய் சேதுபதிக்கு ஜோடியாக சம்யுக்தா நடித்துள்ளார். முக்கிய கதாபாத்திரங்களில் தபு, துனியா விஜய், ஜரீனா வஹாப், பிரம்மாஜி, விடிவி கணேஷ் உள்ளிட்ட பலர் நடித்துள்ளனர். தேசிய விருது பெற்ற இசையமைப்பாளர் ஹர்ஷவர்தன் ராமேஷ்வர் இசையமைத்துள்ள இந்த திரைப்படம் தமிழ், தெலுங்கு, கன்னடம், மலையாளம் மற்றும் இந்தி ஆகிய ஐந்து மொழிகளில் பான்-இந்தியா அளவில் வெளியாக உள்ளது.