விஜய் ஆண்டனி நடிப்பில், மு. மாறன் எழுதி இயக்கியுள்ள ‘அப்பா குட்டி’ திரைப்படத்தின் டிரைலர் வெளியீடு மற்றும் பத்திரிகையாளர் சந்திப்பு சென்னையில் நடைபெற்றது. தந்தைக்கும் மகளுக்கும் இடையிலான அன்பு, பாசம் மற்றும் உணர்வுபூர்வமான உறவை மையமாகக் கொண்டு உருவாகியுள்ள இப்படம், குடும்ப உணர்வுகளுடன் ஆக்ஷன் மற்றும் வணிக அம்சங்களையும் கொண்டுள்ளது. மீரா விஜய் ஆண்டனி, விஜய் ஆண்டனி ஃபிலிம் கார்ப்பரேஷன் சார்பில் தயாரித்துள்ள இப்படம் நவம்பர் 20, 2026 அன்று உலகம் முழுவதும் திரையரங்குகளில் வெளியாகிறது.
நிகழ்ச்சியில் பேசிய இயக்குநர் மு. மாறன், ‘அப்பா குட்டி’ தனது நான்காவது திரைப்படம் என்றும், இதற்கு முன்பு இயக்கிய மூன்று படங்களும் கிரைம் த்ரில்லர் ஜானரில் அமைந்திருந்ததால், இந்த முறை முற்றிலும் வித்தியாசமான கதைக்களத்தில் படம் இயக்கியிருப்பதாகவும் தெரிவித்தார். இந்தக் கதையைப் பல தயாரிப்பாளர்களிடம் கூறியபோது அனைவருக்கும் பிடித்திருந்ததாகவும், கதாநாயகனாக விஜய் ஆண்டனி நடித்தால் சிறப்பாக இருக்கும் என்று தான் பரிந்துரைத்ததாகவும் கூறினார். விஜய் ஆண்டனியிடம் கதையின் முதல் பாதியைச் சொன்னதுமே அவர் படத்தில் நடிக்க ஒப்புக்கொண்டதாகவும், இரண்டாம் பாதியைக் கேட்டதும் உடனடியாகப் படத்தைத் தொடங்கலாம் என்று கூறியதாகவும் தெரிவித்தார். நல்ல கதைகளுக்கு எப்போதும் அங்கீகாரம் கிடைக்கும் என்பதற்கு ‘அப்பா குட்டி’ திரைப்படம் ஓர் உதாரணமாக அமையும் என்றும், படத்திற்கு பத்திரிகை மற்றும் ஊடக நண்பர்கள் தொடர்ந்து ஆதரவு அளிக்க வேண்டும் என்றும் கேட்டுக்கொண்டார்.
நடிகர் விஜய் ஆண்டனி பேசுகையில், ‘அப்பா குட்டி’ படத்தின் கதையைக் கேட்டபோதே மிகவும் பிடித்துவிட்டதாகவும், முதல் பாதியைக் கேட்டதுமே நடிக்க ஒப்புக்கொண்டதாகவும் தெரிவித்தார். குறிப்பாக, படத்தின் கிளைமாக்ஸ் மிகவும் சிறப்பாக அமைந்துள்ளதாகவும், இந்தத் திரைப்படம் தனது திரைப்பயணத்தில் முக்கியமான மைல்கல்லாக இருக்கும் என்றும் நம்பிக்கை தெரிவித்தார். படத்தின் பாடல்கள் உணர்வுபூர்வமாக அமைந்துள்ளதாகக் குறிப்பிட்ட அவர், குறிப்பாக அப்பாவைப் பற்றிய பாடல் இசைஞானி இளையராஜாவின் காலத்தால் அழியாத பாடல்களை நினைவுபடுத்துவதாகக் கூறினார். இயக்குநர் மு. மாறனின் தெளிவான திட்டமிடல், திறமை மற்றும் வேகமான பணிகளைப் பாராட்டிய விஜய் ஆண்டனி, கதையின் தன்மைக்கு எந்தவிதமான பாதிப்பும் இல்லாமல் குறுகிய காலத்தில் படத்தை முடித்திருப்பதாகத் தெரிவித்தார். ப்ரீத்தி அஸ்ராணி தமிழை நன்கு கற்றுக்கொண்டு அழகாக வசனங்களைப் பேசி நடித்திருப்பதாகவும், பேபி லிதன்யா மிகச் சிறிய வயதிலேயே அனுபவம் வாய்ந்த நடிகையைப் போலத் தொழில்முறையுடன் நடித்திருப்பதாகவும் பாராட்டினார். படத்தில் பணியாற்றிய அனைத்து நடிகர்கள், தொழில்நுட்பக் கலைஞர்கள், தயாரிப்பாளர் தனஞ்செயன் மற்றும் விநியோகஸ்தர் ஃபைவ் ஸ்டார் செந்தில் உள்ளிட்ட அனைவருக்கும் நன்றி தெரிவித்தார். மேலும், ‘பிச்சைக்காரன் 3’ படத்தின் படப்பிடிப்பு வேகமாக நடைபெற்று வருவதாகவும், அந்தப் படமும் விரைவில் வெளியாகும் என நம்புவதாகவும் குறிப்பிட்டார்.
நடிகை ப்ரீத்தி அஸ்ராணி பேசுகையில், ‘அப்பா குட்டி’ திரைப்படம் தனக்கு மிகவும் நெருக்கமான படமாக அமைந்துள்ளதாகத் தெரிவித்தார். பொதுவாக அம்மாவின் அன்பையும் தியாகத்தையும் அதிகமாகப் பேசும் நாம், அப்பாக்கள் தங்களது அன்பையும் உணர்வுகளையும் வெளிப்படையாகக் காட்டாததால் அவர்கள் செய்யும் தியாகங்களையும் முயற்சிகளையும் பல நேரங்களில் கவனிப்பதில்லை என்று குறிப்பிட்டார். இந்தப் படத்தைப் பார்த்த பிறகு பலரும் தங்களது அப்பாவைத் தொலைபேசியில் அழைத்துப் பேசுவார்கள் என்று நம்பிக்கை தெரிவித்தார். வயதில் இளமையாக இருந்தாலும் முதிர்ச்சியான சிந்தனைகளைக் கொண்ட கதாபாத்திரத்தில் நடிப்பது சவாலாக இருந்ததாகவும், இயக்குநர் மு. மாறன் தனக்கு நம்பிக்கையளித்து நடிக்க வைத்ததாகவும் கூறினார். விஜய் ஆண்டனியின் எளிமை, தொழில்முறை அணுகுமுறை மற்றும் கதைத்தேர்வைப் பாராட்டிய அவர், சக நடிகர்களுக்குத் தேவையான சுதந்திரத்தையும் வசதியையும் அவர் வழங்கியதாகத் தெரிவித்தார். ‘அப்பா குட்டி’ வழக்கமான உணர்வுபூர்வமான படமாக மட்டுமல்லாமல், வித்தியாசமான கதைக்களம் மற்றும் வணிக அம்சங்களுடன் உருவாகியுள்ளதாகவும் கூறினார்.
ஒளிப்பதிவாளர் ராஜீவ் ராஜேந்திரன் பேசுகையில், இந்தப் படத்தின் ஒளிப்பதிவுப் பொறுப்பை வழங்கிய விஜய் ஆண்டனிக்கு நன்றி தெரிவித்தார். இயக்குநர் மு. மாறனுடன் இருந்த நல்ல புரிதலும், படக்குழுவினரின் ஒத்துழைப்பும் பணியைச் சிறப்பான அனுபவமாக மாற்றியதாகக் குறிப்பிட்டார். குறிப்பாக, படத்தின் முக்கியமான பகுதிகள் ஊட்டியில் படமாக்கப்பட்டதாகவும், ஒளிப்பதிவாளராகப் பல்வேறு காட்சியமைப்புகளை உருவாக்க ஊட்டி சிறந்த வாய்ப்புகளை வழங்கியதாகவும் தெரிவித்தார். திரையரங்குகளில் படத்தைப் பார்க்கும்போது ரசிகர்கள் அந்தக் காட்சிகளை நிச்சயம் ரசிப்பார்கள் என்றும் நம்பிக்கை தெரிவித்தார்.
தயாரிப்பாளர் ஜி. தனஞ்செயன் பேசுகையில், சுமார் நான்கு மாதங்களுக்கு முன்பே ‘அப்பா குட்டி’ படத்தைத் தனது மனைவியுடன் பார்த்ததாகவும், படம் முடிந்தபோது இருவருமே கண்கலங்கியதாகவும் தெரிவித்தார். ‘தெய்வத்திருமகள்’ திரைப்படத்தைப் போலவே, ஒரு தந்தை தனது மகளுக்காக எந்த அளவுக்குச் செல்ல முடியும் என்பதை விஜய் ஆண்டனி இந்தப் படத்தில் அழுத்தமாக வெளிப்படுத்தியிருப்பதாகப் பாராட்டினார். இயக்குநர் மு. மாறன் ஒரே ஷெட்யூலில் சுமார் 60 நாட்களில் படத்தை முடித்திருப்பதுடன், கதையின் உணர்வுபூர்வமான அம்சங்களைச் சிறப்பாகத் திரையில் கொண்டுவந்துள்ளதாகவும் கூறினார். ஒரு குழந்தைக்குத் தாயாக நடிக்கும் சவாலான கதாபாத்திரத்தை ஏற்று ப்ரீத்தி அஸ்ராணி சிறப்பாக நடித்திருப்பதாகவும், பேபி லிதன்யாவின் நடிப்பு, வசன உச்சரிப்பு மற்றும் விஜய் ஆண்டனியுடன் அவர் வெளிப்படுத்திய உணர்வுகள் மிகவும் சிறப்பாக அமைந்துள்ளதாகவும் பாராட்டினார்.
மேலும், தமிழ் மொழி தெரியாத சர்வதேச ஓடிடி நிறுவனப் பிரதிநிதிகளுக்குப் படத்தைத் திரையிட்டபோது, கதையுடன் உணர்வுபூர்வமாக ஒன்றிணைந்த அவர்கள் இடைவேளையைக்கூட நிறுத்தாமல் தொடர்ந்து படத்தைப் பார்க்க விரும்பியதாகவும், படம் முடிந்ததும் நெகிழ்ச்சியடைந்து படத்தை வாங்குவதற்கான ஆர்வத்தை வெளிப்படுத்தியதாகவும் தெரிவித்தார். ஜீ தொலைக்காட்சி நிறுவனமும் படத்தின் சாட்டிலைட் உரிமையைக் கைப்பற்றியுள்ளதாகக் குறிப்பிட்டார். விநியோகஸ்தர் ஃபைவ் ஸ்டார் செந்தில் தனது குடும்பத்துடன் படத்தைப் பார்த்துவிட்டு உடனடியாகத் திரையரங்க வெளியீட்டு உரிமையைக் கைப்பற்றியதாகவும் தெரிவித்தார். படம் வெளியாகும் முன்பே கிடைத்துள்ள இந்த அங்கீகாரம், அதன் வலுவான கதைக்குக் கிடைத்த மரியாதை என்றும் கூறினார்.
விநியோகஸ்தர் ஃபைவ் ஸ்டார் செந்தில் பேசுகையில், ‘அப்பா குட்டி’ திரைப்படத்தை ஏற்கெனவே பார்த்துவிட்டதாகவும், படம் மிகவும் சிறப்பாக வந்துள்ளதாகவும் தெரிவித்தார். தந்தைக்கும் மகளுக்கும் இடையிலான பாசத்தை இயக்குநர் மு. மாறன் மிகவும் உணர்வுபூர்வமாகப் படமாக்கியுள்ளதாகவும், விஜய் ஆண்டனி சிறப்பாக நடித்திருப்பதாகவும் பாராட்டினார். அனைத்து வயதினரையும் கவரக்கூடிய இப்படத்தை ரசிகர்கள் குடும்பத்துடன் திரையரங்குகளுக்கு வந்து பார்த்து ஆதரிக்க வேண்டும் என்றும் கேட்டுக்கொண்டார்.
இயக்குநர் மந்திரமூர்த்தி பேசுகையில், விஜய் ஆண்டனியின் கடின உழைப்பு, அர்ப்பணிப்பு மற்றும் கொடுத்த வாக்கைக் காப்பாற்றும் பண்பைப் பாராட்டினார். மேலும், ப்ரீத்தி அஸ்ராணி எந்தவிதமான கதாபாத்திரத்தையும் சிறப்பாக ஏற்று நடிக்கும் திறமை கொண்டவர் என்றும், தமிழ் சினிமாவில் அவர் இன்னும் பல உயரங்களை அடைய வேண்டும் என்றும் வாழ்த்தினார்.
நடிகர் ஜென்சன் திவாகர் பேசுகையில், ‘அப்பா குட்டி’ திரைப்படத்தின் திரைக்கதை முதல் சில பக்கங்களிலேயே தன்னை ஈர்த்துவிட்டதாகவும், கிரைம் த்ரில்லராகத் தொடங்கும் கதை பின்னர் உணர்வுபூர்வமான அனுபவமாக மாறுவதாகவும் தெரிவித்தார். கதையில் இடம்பெற்ற உணர்வுகளைத் திரையில் அழகாகக் கொண்டுவந்ததற்கு இயக்குநரின் திறமையும் நடிகர் தேர்வும் முக்கியக் காரணம் என்றார். தயாரிப்பாளர், இசையமைப்பாளர், படத்தொகுப்பாளர் எனப் பல பொறுப்புகளை ஏற்றுள்ள விஜய் ஆண்டனியின் அர்ப்பணிப்பைப் பாராட்டிய அவர், ப்ரீத்தி அஸ்ராணி தமிழை அழகாகப் பேசி நடித்திருப்பதையும் குறிப்பிட்டார். நடிகர் மூணாறு ரமேஷ் மற்றும் நடிகை லிஸ்ஸி ஆண்டனியும் படத்தின் தந்தை – மகள் உறவை மையமாகக் கொண்ட உணர்வுபூர்வமான கதையையும் பாடல்களையும் பாராட்டினர்.
படத்தில் முக்கிய கதாபாத்திரத்தில் நடித்துள்ள பேபி லிதன்யா பேசுகையில், விஜய் ஆண்டனி அங்கிள் மற்றும் ப்ரீத்தி அக்காவுடன் இணைந்து நடித்தது மிகவும் மகிழ்ச்சியாக இருந்ததாகவும், படப்பிடிப்பில் அனைவரும் தன்னிடம் அன்பாகப் பழகியதாகவும் தெரிவித்தார். அனைவரும் திரையரங்குகளுக்கு வந்து படத்தைப் பார்த்து ஆதரவு அளிக்க வேண்டும் என்றும் கேட்டுக்கொண்டார்.
மேலும், இயக்குநர் சசி, நடிகர் முருகானந்தம், பாடலாசிரியர்கள் ஏகாதசி, அருண் பாரதி, நடிகைகள் ஹரிப்ரியா, ஹரிதா உள்ளிட்டோரும் நிகழ்ச்சியில் கலந்துகொண்டு படத்தின் உருவாக்க அனுபவங்கள், பாடல்கள் மற்றும் படக்குழுவினரின் பணிகள் குறித்து தங்களது கருத்துகளைப் பகிர்ந்துகொண்டனர்.
மு. மாறன் எழுதி இயக்கியுள்ள ‘அப்பா குட்டி’ திரைப்படத்தில் விஜய் ஆண்டனி, ப்ரீத்தி அஸ்ராணி, பேபி லிதன்யா ஆகியோருடன் பகவதி பெருமாள், ஹரிப்ரியா இசை, அருவி மதன், சித்ரா லட்சுமணன், ஸ்ரீஜா ரவி உள்ளிட்ட பலர் நடித்துள்ளனர். விஜய் ஆண்டனி இசையமைப்பதுடன் படத்தொகுப்புப் பணிகளையும் மேற்கொண்டுள்ளார். ராஜீவ் ராஜேந்திரன் ஒளிப்பதிவு செய்துள்ளார். மீரா விஜய் ஆண்டனி, விஜய் ஆண்டனி ஃபிலிம் கார்ப்பரேஷன் சார்பில் தயாரித்துள்ள இப்படத்தின் இசை உரிமையை விஜய் ஆண்டனி மியூசிக் நிறுவனம் பெற்றுள்ளது. திரையரங்க வெளியீட்டு உரிமையை ஃபைவ் ஸ்டார் செந்தில் கைப்பற்றியுள்ளார். தந்தை – மகள் உறவை மையமாகக் கொண்டு உணர்வுகளும் ஆக்ஷன் காட்சிகளும் கலந்த குடும்பப் பொழுதுபோக்குத் திரைப்படமாக உருவாகியுள்ள ‘அப்பா குட்டி’ நவம்பர் 20, 2026 அன்று உலகம் முழுவதும் திரையரங்குகளில் வெளியாகிறது.