ஸ்டோன் பெஞ்ச் ஸ்டுடியோ மற்றும் மிஸ்ரிலால் பிக்சர்ஸ் நிறுவனங்கள் இணைந்து தயாரிக்கும் ‘ஹைட் & சில்க்’ திரைப்படத்தின் டைட்டில் கிளிம்ப்ஸ் வெளியாகியுள்ளது. சுஹாஸ் கதாநாயகனாக நடிக்கும் இப்படத்தின் ப்ரோமோவைத் தெலுங்கு ரசிகர்களுக்காக நடிகர் வருண் தேஜும், தமிழ் ரசிகர்களுக்காக நடிகர் சூரியும் வெளியிட்டுள்ளனர். பட்டுப் புடவைகளை நெய்யும் நெசவாளரின் வாழ்க்கையையும் நவீன காலத்தைச் சேர்ந்த ஒரு பெண்ணின் உலகத்தையும் இணைக்கும் வித்தியாசமான கதைக்களத்துடன் வெளியாகியுள்ள இந்தப் ப்ரோமோ, படத்தின் மீதான எதிர்பார்ப்பை அதிகரித்துள்ளது.

ஸ்டோன் பெஞ்ச் ஸ்டுடியோ நிறுவனத்தின் தயாரிப்பாளர் கார்த்திகேயன் சந்தானம், தமிழ் மற்றும் மலையாளத் திரையுலகில் இதுவரை 18 திரைப்படங்களைத் தயாரித்துள்ளார். தற்போது தெலுங்குத் திரையுலகிலும் தனது தயாரிப்புப் பணிகளை விரிவுபடுத்தத் திட்டமிட்டுள்ள அவர், நான்கு திரைப்படங்களைத் தயாரிக்க உள்ளார். அந்த வரிசையில் உருவாகும் முதல் திரைப்படம்தான் ‘ஹைட் & சில்க்’. இந்தப் புதிய முயற்சியில் கார்த்திகேயன் சந்தானத்தின் ஸ்டோன் பெஞ்ச் ஸ்டுடியோ நிறுவனத்துடன் வர்திகா ஜெயினின் மிஸ்ரிலால் பிக்சர்ஸ் நிறுவனம் இணைந்துள்ளது. இப்படம் தமிழ் மற்றும் தெலுங்கு ஆகிய இரு மொழிகளிலும் வெளியாகவுள்ளது.

‘மண்டாடி’ படத்தைத் தொடர்ந்து சுஹாஸ் இப்படத்தில் கதாநாயகனாக நடிக்கிறார். ‘லப்பர் பந்து’, ‘DC’ ஆகிய படங்களில் நடித்த சஞ்சனா, மூத்த நடிகர் தனிகெல்லா பரணி, நந்து மற்றும் கருணாகரன் ஆகியோர் முக்கிய கதாபாத்திரங்களில் நடித்துள்ளனர். பிரபல இயக்குநர் கார்த்திக் சுப்புராஜிடம் உதவி இயக்குநராகப் பணியாற்றிய ராஜேந்திர பாலா, இப்படத்தை எழுதி இயக்கியுள்ளார். இயக்குநராக அவர் அறிமுகமாகும் திரைப்படம் என்பதும் குறிப்பிடத்தக்கது.

தற்போது வெளியாகியுள்ள டைட்டில் கிளிம்ப்ஸ், பட்டுப் புடவைகளை நெய்யும் ஒரு நெசவாளரின் வாழ்க்கையில் நவீன காலத்தைச் சேர்ந்த பெண் ஒருவரின் உலகம் சந்திக்கும் தருணத்தை அறிமுகப்படுத்துகிறது. ஒவ்வொரு பட்டுப் புடவைக்கும் அதை அணிய வேண்டிய ஒரு பெண் விதிக்கப்பட்டிருக்கிறாள் என்ற கவித்துவமான சிந்தனையை நெசவாளரின் குரல் வெளிப்படுத்துகிறது. ஒரு புடவையின் அழகு அதை நெய்யும் செயல்முறையோடு முடிந்துவிடுவதில்லை என்பதையும், அந்தப் புடவை தனக்குரிய பெண்ணைத் தேர்ந்தெடுக்கிறது என்ற சுவாரசியமான கருத்தையும் ப்ரோமோ முன்வைக்கிறது. முற்றிலும் மாறுபட்ட இரு உலகங்களைச் சேர்ந்தவர்களின் சந்திப்பை மையமாகக் கொண்ட இப்படத்தின் கதைக்களம் ரசிகர்களிடையே ஆர்வத்தை ஏற்படுத்தியுள்ளது.

இப்படத்திற்கு கார்த்திக் பழனி ஒளிப்பதிவு செய்ய, ஷஃபீக் முகமது அலி படத்தொகுப்புப் பணிகளை மேற்கொள்கிறார். ‘3 BHK’ படத்தின் மூலம் கவனம் பெற்ற அம்ரித் ராம்நாத் இசையமைக்கிறார். ‘அனிமல்’, ‘பேட்ட’ உள்ளிட்ட படங்களில் பணியாற்றிய சுரேஷ் செல்வராஜன் தயாரிப்பு வடிவமைப்பாளராகப் பணியாற்றுகிறார். ஜஷுவா சண்டைக் காட்சிகளை வடிவமைக்க, பிரவீன் ராஜா ஆடை வடிவமைப்பைக் கவனிக்கிறார். ஷெரீப் நடன இயக்குநராகவும், மோகன் ராஜன் பாடலாசிரியராகவும் பணியாற்றுகின்றனர். சுரேன் ஜி மற்றும் அழகிய கூத்தன் ஒலி வடிவமைப்புப் பணிகளை மேற்கொள்ள, ஒலி கலவையை சுரேன் ஜி கவனிக்கிறார். அமோல் போடகே கலை இயக்குநராகப் பணியாற்றுகிறார்.

கார்த்திகேயன் சந்தானம் மற்றும் வர்திகா ஜெயின் இணைந்து ஸ்டோன் பெஞ்ச் ஸ்டுடியோ மற்றும் மிஸ்ரிலால் பிக்சர்ஸ் நிறுவனங்களின் சார்பில் தயாரிக்கும் ‘ஹைட் & சில்க்’ திரைப்படம் விரைவில் வெளியாகவுள்ளது. படத்தின் வெளியீட்டுத் தேதி மற்றும் இதர விவரங்கள் குறித்த அறிவிப்புகள் அடுத்தடுத்த நாட்களில் வெளியாகும் என எதிர்பார்க்கப்படுகிறது.